ئەمڕۆ پێنجشەممە 17ـی ئاداری 2022، بەڕێوەبەرایەتیی گشتیی تەندروستیی هەولێر بڵاویکردەوە، لیژنەیەکی پێکهێناوە بۆ بەداواداچوون و چاودێریکردنی ناوەندەکانی تەندروستی لە رۆژانی پشووی جەژنی نەورۆز کە خزمەتگوزارییە پزیشکییە تەندروستیەکان پێشکێش دەکەن، بەمشێوەیەی خوارەوە:

 

1- نەخۆشخانەکانی فریاکەوتن بەردەوام دەبن لە ئەرکیان لەڕێگەی ئێشکگری 24 کاژێری و بەردەوام بەڕووی هاووڵاتیان بۆ پێشکێشکردنی خزمەتگوزاری پزیشکی تەندروستی کراوە دەبن.

 

2- سەنتەری هاوئاهەنگیی فریاکەوتن 122، بەردەوام 24 کاژێر لەسەر هێڵ دەبێت لەڕێگەی هێڵی ژمارەی "122" بۆ گەیاندنی تیمی پزیشکی بەهاناوەچوون بۆ هەر حاڵەتێک کە پێویستی بە تیمی پزیشکی هەبێت.

 

3- بەشی کردە پزیشکییەکان 10 تیمی پزیشکی و ئەمبووڵانسیان ئامادەکردووە لە شوێنە گەشتیارییەکانی سنووری شاری هەولێر بۆ هەر حالەتێکی رووداو بۆ ئەوەی هاووڵاتیان لە نزیکەوە سوود لە پێشکێشکردنی خزمەتگوزاریی پزیشکی تەندروستی وەربگرن.

 

4- سەنتەری بانکی خوێن بەشێوەی ئیشکگری لەخزمەت هاووڵاتیان دەبیت بەشێوەی 24 کاژێر.

 

(تیمەکانی فریاگوزاری بەم شێوە دابەشکراون).

 

1- بازگەی هەولێر 

2- هاوینە هەواری هەنارە

3- هاوینە هەواری دڵۆپە

4- بنکەی فریاگوزاریی شێراوە

5- سنووری شارۆچکەی مەخموور

6- پارکی شەهید سامی عەبدولڕەحمان

7- هاوینە هەواری شێخ توڕاب

8- پارکی شانەدەر

9- بنکەی فریاگوزاریی خانزاد

10- هاوینە هەواری دووین

11- بنکەی فریاگوزاریی گۆمەسپان

12- بنکەی فریاگوزاریی خەبات

13- سنووری شەقڵاوە، 2 تیم

14- هاوینەهەواری گەلی عەلی بەگ

15- دەڤەری بارزان، 2تیم /مەیدانۆک - رێزان.

 

بژار موسا، گوتەبێژی بەڕێوەبەرایەتیی گشتیی تەندروستی هەولێر ئەمڕۆ پێنجشەممە بە تۆڕی میدیایی رووداوی گوت: "17 تیممان لە 15 بنکە دەبن کە کارمەندی تەندروستیی راهێنراویان تێدایە بۆ رووبەڕووبونەوەی هەر حاڵەتێکی تێکچوونی تەندروستی یان بەهۆی رووداوەکانەوە و ئەو کارمەندانە لەخزمەتی خەڵکی خۆجێیی و هەروەها ئەو گەشتیارانەش دەبن کە لە رۆژانی جەژنی نەورۆزدا دێنە هەرێمی کوردستان".